anlässlich der Triennale Wallis 2014
Foto: Andrea Thüler/kulturtv.ch
TurtFrauGarn 22
An Tagen wie diesen…
Uf dr Ufschliesstour am Morge e Plädu.. für e Räschte muesi z Velo stosse.
U itz chunnt no so eine vo dene hübsche Platzräge,
dass i mi zersch mues ga angers aalege, bevor i z’Hotel cha uftue.
Mit ere grosszügige Handbewegig legen i e Fläsche Wy z’Bode u ha e haub Stung meh z’putze.
Dusse wird es nätts Lüftli zum ne usgwachsne Sturm u wirblet eine vo dene grooooosse Sunneschirme düre Garte. Zum Glück bin i o so gross u starch – nach 4 Chräble u 3 Ganzkörper-Schleeg han i ne bändiget. Itz ligt er ganz brav u kabutt näb sine ufrächte Kollege am Bode.
Uf d’ Zueschliesstour muesi mit emne Mannevelo, was i nid gwanet bi.
Bim erschte Abstiig blibeni mit de Hose bhange u troole gredi uf d’ Strass use.
Es het mi gloub niemmer gseh!
Dr zwöit Abstiig glingt mer scho besser, e chly Schreeglag mues drin lige…
Won i d’Caverne de Platon abechume isch ds Schlöösli niene meh - ke Ahnig won i das verlore ha, aber dr Wink verstahni! Hätt nämlech am Vortag zwo Journalistinne, wo partout nid hei wöue säge für wän si schribe u partout nüt hei wöue zahle u dr Uswiis mr so naach ad’ Nase greckt hei, dass i nüt ha chönne läse u drzue no ganz unfründlech si gsy, am Liebschte dert unge ypschlosse….
U itz isch äbe das Schlöösli wäg - sithär hani dert unge chly es gruseligs Gfüeu bim uf- u zuetue –säuber tschuld!
Ungfähr bim 5. Abstiig blibeni am Brunnerand bhange, wüu z’Schildli vom Flüger scho wider abegheit isch - u ja es het mi ire komplizierte Spiralbewegig ume Brunne glismet…
Es het mi gloub niemmer gseh.
Schliesslech bini uf em Bürgestock aachoh, wott dert es frächs Fötzeli ab em edle Teppich näh, es entpuppt sech aus Schärbe u schnyt mer zünftig i Finger.
Mit emne bluetige Finger, 4 Chräble u etleche Mose vom Tanz mit em Sunneschirm, pumpeni am Änd mis Velo so uf, dass i cha zum Guschti hingere fahre.
Dert darfi Himbeeri abläse, dr Guschti flickt mer mis Velo u nach eme Glas Wy schynt dr Tag grettet.
Bim Heifahre mit emne Gschirr vou Himpi im Velochörbli bini richtig zfride, bis eini mit ihrem Ggöppu chunnt hingeremne Huus vüre z’schiesse u mi fasch überfahrt!
Mit em Mannevelo hätts mi itz grad z’dritt mau überschlage…
üüühhh hani die vor Chlupf aapäägget, si het gseit es tüegere leid u d’ Himbeeri sige ja no im Chörbli…
Alle Texte und Fotos von Andrea Thüler –> hier
Homepage Andrea Thüler –> hier
Alles zur Triennale Wallis 2014 –> hier
Alle Infos zum Standort "Turtmann" - hier
Keine Kommentare:
Kommentar veröffentlichen