anlässlich der Triennale Wallis 2014
Foto ©Andrea Thüler/kulturtv.ch
TurtFrauGarn 7
inneri Monolög
Du bisch e Schribtischtäter!
E Chopffüessler!
Hie ir Mitti eifach n ü t !!
Du hesch no nie im ne Autersheim gschaffet
süsch wüsstisch wie me bi aute Lüt ds Inträsse
weckt für Kunscht,
wie me se cha abhole
nid mit em Rollator!
mit emne Biud, ere Gschicht, emne Lächle
oder zmingscht mit ere liebevoue Geschte!
Die sy nid blöd! o nid beschränkt!
Die sy gwungrig u luschtig u zfride u Gescht
sy schliesslech Gescht
Aber du bisch äben e Chopffüessler un e Schribtischtäter wo
intellektuellkonzeptuellinterdisziplinärgordnetschwarzufwyss kommuniziert
Mir tuet die Kunscht leid wo au die starche,
truurige, töiffe, sinnleche, luschtige, ufmüpfige, fragwürdige, nachdänkleche, schreckleche, gspängstische, poetische Gschichte verzeut u
nid xeh wird u nid ghört wird u nid gfunge wird!
Aber vilech müesstisch mer eher du leid tue i
dine sublime KunschtSatzGebilde
u so ohni jeglechi Sinnlechkeit, eifach da i dr Mitti läär u nüt!
Aber vilech isch ja grad das Kunscht we
da ... aues läär isch,
zwüschem Gring u de Scheiche eifach nüt!
Kes Gerangel im Gedärm, kes Gschtürm im Härz,
eifach e grossi, wyti Lääri
e lääri Kunscht vou Nüt
es Konstrukt vo lääre Gedanke
schwarz wyss ufgreielet
läär u nüt u Kunscht
vom ne Chopffüessler
um ne Schribtischtäter
U niemmer chunnt ne cho bsueche
wüu da isch ja nüt
nume Lääri
nume Lääri
nume Lääri
Alle Texte und Fotos von Andrea Thüler –> hier
Homepage Andrea Thüler –> hier
Alles zur Triennale Wallis 2014 –> hier
Homepage Andrea Thüler –> hier
Alles zur Triennale Wallis 2014 –> hier
Keine Kommentare:
Kommentar veröffentlichen